Hèrmåle-dizos-Hu èst bin k'nohou po tot costé dès amateûrs d'ârt po s' Madone, li Sedes sapientiae de Hermalle-sous-Huy; èle a inspiré l' grafiste Dany Visentin po c' logo.

Å bê mitan d'ine réjion bin mètowe po l'tourisse, li comèrce, li syince, lès-årts èt li spôrt, inte Lîdje èt Hu, tot près d'Tihandje èt d'Bièrsèt, åhèye po-z-î ariver a 500 mètes dèl nacionåle N 90, Hèrmåle-dizos-Hu fêt çou qu'i fåt po wårder l'påhûlisté dèl campagne.

Å mitan d'l'ancyin viyèdje, dès fwért bèlès mohones dès XVIIe èt XVIIIe siéke -avou l'mohone wice qui l'mêsse-maçon Jean-Gille Jacob a m'nou å monde, avou dès tåv'lês qu'on n'veût qu'la è l'Eûrope qui r'prézintèt lès mèstis dè batimint å XVIIIe siéke- si trovèt tot-åtoû dè tchèstê èt di s'grande cinse qui pout s'viziter :

Lès batimints sont tot-åtoû d'ine coûr pavêye, avou dès fleûrs, wice qui lès-èfants polèt djouwer sins dandjî. I dåtèt principålemint dès XVIIe èt XVIIIe siéke.

Li lodjis' dèl cinse, so l'costé dè nôrd riçut ine toûr cwårèye, pwète disdindowe d'avance par on pont lèvis. C'èsteut li seûle intrèye po moussî è tchèstê. Vos i veûrez scrit so li d'zeûr dèl pwète 1642.

Eune dès pus bèlès grègnes "so l'lårdjeûr" dèl Province di Lîdje (17 m. di hôt so 14 di lådje èt 32 di long) a treûs lèvês don lès tchèrpintes s'ènondèt so l'costé sûd.
Dizos lès deûs-ostèdjes dèl grègne, deûs såles coviètes di voûtes, wice qu'on troûve li Mûzêye dèl Goûrmandise èt sa botikê di souv'nîrs. - c'esteût lès "såles capitulères dèl cinse" (Paris-Match).
La ossi qu'on done dès concêrts èt qu'i-n-a dès èspôzicions dispôy 1991. On î arive po l'posti dè hôt meûr qui done so l' tèrasse di vèrdeûre.

Dispôy 1993, l'association sans but lucratif La Rawète* a trové djîse al Ferme Castrale*. L'associyåcion êde a r'mète lès batimints d'adreût, a fé k'nohe lès ritchèsses di tot çou qu'èst dè bin magnî tot rapoûlant èt tot r'mètant an-état lès documints èt tot çou qui toûne åtoû d'l'amagnî, dèl toûbak', di l'istwére èt dèl couhène (por èl Bèljike èt spéciålemint èl Walonerèye).

L'asbl* èst prôpriétêre d'ine ritche bibiliothéque, d'on mûzêye fwért intèrèssant èt d'ine taviène la wice qu'on mèt' so l'tåve dès r'cètes dè tins passé.

Totes lès saminnes di l'annêye, vos profit'rez di l'ocåzion po nos rèscontrer, nos djåzans ossu bin l'flamind qui l'français bin sûr.

• Dès-èspôzicions, dès concêrts, dès spèctåkes, fwért sovint èt fwért bons, 
• dèl plèce tant qu'on vout po lès vwètûres,
• åhèye po lès djins qu'ont pus målåhèye,
• lès djeûs po lès-èfants,
• li feû è l'èsse, èt magnî sorlon lès vîlès r'cètes dè payis,
• l'intèrèt dè mûzêye èt dèl bibiliothéque,
• dès guides qui s'î k'nohèt èt qui djåzèt lès deûs langues dè payis,
• èt in-akeûy vormint walon.

L'Asbl propôse dès locåls sins parèy po lès rèyûnions d'totes sôrs, dès locåls si bês qu'il ont-st-assètchî 18.000 viziteûrs è 1999 èt qu'on 'nn'a tot plin djåzé d'vins lès médias.